Naeampasan it Bureau of Customs (BOC) ro target nga koleksyon kara sa nagtaliwan nga buean it Mayo.
Nakakolekta ro BOC it P77.79 bilyon pesos ukon eampas it P5.44 bilyon pesos sa gintaeana nga target kara nga makolekta nga P72.35 bilyon pesos.
Mas mataas man raya it P11.50 bilyon pesos ukon 17.36% kumpara sa nakolekta it ahensya ko Mayo 2022.
Umpisa Enero hasta Mayo, nakakolekta eon ro BOC it kabilugan nga P359.17 bilyon pesos eampas sa P13.23 bilyon pesos sa gintaeana nga target collection kara nga P345.94 bilyon pesos kun sa siin mas mataas man raya it P38.66 bilyon pesos kumpara sa nakolekta sa unang limang buean it 2022.
Sa idaeum it pagdumaea ni Commissioner Bienvenido Rubio, naging mas maid-id ro pagkolekta it buwis ag mas hugut nga pagbantay sa mga border kontra sa smuggling ro andang gin-obra rason nga naeampasan ro target.
Ginplastar ni Commissioner Rubio ro five-point priority program agud nga mas maging epektibo ro BOC sa pagbuyot sa andang mandato.
Ginpabaskog pa it BOC ro pagbantay sa mga warehouse kun sa siin ginatago ro mga ginpasueod nga produkto, pag-digitalize it proseso agud nga mas maging madasig, mas mabaskog nga koordinasyon sa nagkaeain-eain nga ahensya nga ginaboe-an it permit para sa mga ginapasueod nga produkto, ag ro pagtau it mga bag-ong kasanayan sa mga tawuhan it BOC agud nga mas pa nga magnami ro andang performance.
