KALIBO, Aklan – – – Nagselfie antes nga nagpakamatay ro sangka 22-anyos nga eaeaki sa Sitio Guba, Brgy. Tigayon, Kalibo.
Nakaangkon it patal nga lastro sa waea nga ueo ro biktimang si “Alyas Mac-Mac” ag residente it nasambitang lugar matapos nga nagbaril sa anang kaugalingon.
Base sa inisyal nga imbestigasyon it Kalibo Police Station, nakabaton it tawag ro andang taeatapan bandang alas-10:00 it kagab-ihon halin sa pamilya it biktima kon siin may nabatian sandang eopok it baril.
Sa pag-usisa, nakit-an si “mac-mac” nga duguan, nagahamyangon ag uwa eon raya it kabuhi.
Nakumpirma dugang ro ginhimo it biktima matapos nga nakit-an ro litrato sa anang cellphone nga resulta it anang pagselfie nga nakatutok ro baril nga sumpak sa anang ueo antes raya nga ginpaeopok nga nagresulta sa anang hinali nga kamatayon.
Ginapanan-aw nga bangud sa paghigugma kon ham-an it napinsaran it biktima nga utason ro anang kaugalingong kabuhi kon siin una eon sa makaron ro anang bangkay sa sangka funeral homes.
Si Mac-mac hay panganay sa tatlong magmanghod ag ginpabutyag it pamilya nga nauna eon sigon raya nga naghanang pagpakamatay.
