KALIBO, Aklan—Nagapabilin nga owa it kaso it coronavirus disease ukon COVID-19 sa isla it Boracay ag bilog nga banwa it Malay.
Raya ro ginpahayag ni task force deputy information manager Madel Joy Tayco.
Suno kana nga masobra eon lang sa 60 ro nabilin nga mga indibidwal nga ginpaidaeum sa monitoring ukon ginakabig nga persons under monitoring sa Boracay.
Kaibahan ro municipal health office, hugut sigon sanda nga nakikipag-angot sa mga hotels ag iba pang establisimento agud nga masiguro ro kaeowasan it publiko ag ikamayad nga eawas it mga residente ag iba pang mga bisita.
Sa oras sigon nga matapos ro andang 14 diyas nga quarantine hay uman sanda nga gina-check kon may signs and symptoms it virus antes nga pagapasugtan nga makaguwa it isla.
Samtang, ginlaygay ni Tayco sa mga nagaplano nga magbakasyon sa Boracay ag may gina-angkon nga passport hay pirme raya nga daehon agud nga malikawan ro aberya sa pagsueod sa banwa it Malay.
Madumduman nga nauna eon nga nagtukod it border checkpoints ro multi-agency task force ro LGU-Malay agud nga malikawan ro pagsueod it makamaeatay nga coronavirus.
