BORACAY Island — Sambilog ro Boracay All Stars Dragon boat team sa tatlong team halin sa Pilipinas nga magasabak sa International Dragon Boat Festival sa Korea.
Suno kay Nuckie Fernando, head coach it nasambit nga team nga handum nanda nga maka-uli it bueawan nga medalya sa nasambit nga kompetisyon.
Magapasakop ro grupo sa mixed small boat category nga may limang pares nga ginaeakipan it kombinasyon it eaeaki ag babaye.
Ginaeakipan it 16 nga paddlers ro grupo nga nagbiyahe paagto it Korea makaron nga adlaw it Miyerkules.
Maka-engkwentru nanda sa dag-unan nga festivities ro iba pang mga atleta halin sa host country nga Korea ag iba pang mga nasyon kapareho it Hong Kong, Singapore, Canada , Taiwan ag iba pa.
Sa pihak nga parte, nakataeana man nga magasabak ro nasambit nga grupo sa sambilog pang kompetisyon sa Iloilo River Dragon Boat Festival sa maabot nga Nobyembre 23 hasta 24.
