Ginkalipay it Malay Tourism Office ro pagkilaea it Cabin Zero, sangka kilaeang British company it mga travelling bag, sa isla it boracay bilang nagapanguna nga “Best White Sand Beach in the World” makaron nga dag-on.
Suno kay Malay Tourism Officer Dr. Felix delos Santos nga ro nasambit nga pagkilaea hay nagapakita eamang nga nagapanguna nga destination sa mga travelers ro isla bangud sa makaga-eanyak kara nga beauty and charm eabi eon ro anang maputi ag mapino nga baeas.
Ro Boracay hay nabutang sa No. 1 spot sa may pinakamanami nga white sand beach sa bilog nga kalibutan.
Napiyerde kara ro iba pang sikat nga white beach kaeakip ro Whitehaven Beach sa Australia; Clearwater Beach sa Florida kamana man ro Carmel Beach nga nahamtang sa California, Diani Beach sa Kenya, Varadero Beach sa Cuba, Grace Bay sa Turks and Caicos, Long Beach nga nakabase sa Phu Quoc, Vietnam, Palm Beach sa Aruba ag ro pang-10 hay ro Maya Beach sa Thailand.
Sakop it banwa it Malay sa Aklan, ro Boracay hay sikat bangud sa gina-angkon kara nga white sand beach.
Mag-eowas sa scuba diving, snorkeling, windsurfing, kiteboarding, ag cliff diving, ginadagsa man ro Boracay bangud sa night life kara.
Sa pihak nga parte, ro tourist arrivals umpisa ko mayo 1 hasta 31 hay nag-abot sa 182,776.
Sa nasambit nga numero, ro domestic tourists hay 151,820 samtang ro foreign tourists hay 29,325 ag ro OFWs hay 1,631.
Ginaeauman nga mas pa nga magataas ro nasambit nga numero makaron nga hunyo bangud sa bakasyon it mga estudyante.
Samtang, an-um pa nga cruise ships ro ginaeauman nga magadungka sa isla hasta nga matapos ro 2024.
