KALIBO, Aklan—Ginkalipay it lokal nga gobyerno it Malay ro uman nga pagbukas it isla it Boracay sa mga turistang halin sa National Capital Region, Bulacan, Cavite, Rizal, ag Laguna ukon NCR Plus.
Raya hay matapos nga pasugtan eon it Inter-Agency Task Force on Emerging Infectious Diseases (IATF-EID) nga makabiyahe ro mga pumueoyo halin sa NCR Plus paadto sa mga lugar nga una sa idaeom it Modified General Community Quarantine (MGCQ) umpisa kahapon adlaw it Martes hasta Hunyo 15.
Nagaeaum si Malay Mayor Frolibar Bautista nga magiging tayuyon eon ro pag-abot it mga turista sa oras nga eubusan eon nga ipaidaeom ro lugar sa GCQ pagkatapos it Hunyo 15.
Mabuhay eon man suno kana nga haum ro Boracay sa pagbaton it mga turista halin sa nasambit nga mga lugar.
Samtang, nagpadumdom man raya sa mga turista nga makipag-angot anay sa andang airline companies antes magbyahe.
Dugang pa ni Bautista, owa it pagbag-o sa mga ginapatuman nga polisiya para sa mga turistang interesadong magbakasyon sa Boracay.
Base sa entry protocols para sa mga leisure travelers, kinahang-ean nga maka-presenta it valid government ID ag anuman sa saliva ukon swab na negative RT-PCR test result, 72 oras antes ro pagbiyahe; hotel reservation halin sa DOT accredited establishment; detalye it biyahe; S-Pass ag magbuoe it Online Health Declaration Card sang adlaw antes ro biyahe sa pamaagi it touristboracay.com.
