KALIBO, Aklan — Bukon it kwalipikado ro isla it Boracay nga himuong land reform area engkasong paga basehan ro kasuguan sa idaeum it Agrarian Reform Law.
Raya ro gin taongreaksyon sa Bombo Radyo Kalibo ni Atty. Plaridel Morania, sambilog sa mga batikang abugado sa probinsiya it Aklan haungod sa pahayag ni Pangueong Rodrigo Duterte nga plano karang himuon nga land reform area ro Boracay matapos ro an-um nga bueang rehabilitasyon kara.
Suno kay Morania, kun raya hay paga himuong land reform area, ro tanan nga mga buildings sa isla hay paga gub-on ag iga panupod ro mga eugta.
Gin pahayag dugang pa kara nga kinahangean ro “common sense” bangud ro Boracay hay sangka tourist spot area.
Sa pihak kara, gina respeto sigon kara ro desisyon it pangueo ag nagapating mayad ro tinotuyo kara sa pagkay-ad sa isla.
