KALIBO, Aklan—Uman nga ginkilaea ro isla it Boracay bilang Asia’s Leading Luxury Island Destination sa 2024 World Travel Awards (WTA).
Ro anunsyo hay ginpatigayon sa World Travel Awards Asia & Oceania Gala Ceremony sa Manila.
Raya ro unang kahigayunan nga ginpatigayon ro prestihiyosong event sa Pilipinas.
Padayon nga nagaangkon it mga internasyonal nga pasidungog ro isla kaeakip ro “World’s Best Island,” “World’s Greatest Places,” ag “Asia’s Top Island,” nga nagapalig-on sa reputasyon kara bilang sambilog sa ginadayo nga destinasyon sa bilog nga kalibutan.
Ko Agosto 2024, nakalista ro Malay Tourism Office it kabilugang 159,826 nga tourist arrival.
Sa nasambit nga numero, 127,549 kara ro domestic visitors, 30,596 ro foreign tourists, ag 1,681 ro overseas Filipino’s.
Mag-eowas sa pagkilaea sa Boracay, nakuhit man it Pilipinas ro waeo nga iba pang pasidungog.
Suno kay Tourism Secretary Christina Garcia Frasco, ro mga nasambit nga kadungganan hay nagapakita it nagataas nga kumpyansa it kalibutan sa Pilipinas bilang nagapangunang destinasyon it mga turista.
Ro World Travel Awards hay sangka pangkalibutanong inisyatibo nga ginakilaea ro kamayad sa nagkaeain-eain nga sektor it travel, turismo, ag hospitality industries.
