KALIBO, Aklan—Ginpasiguro it Boracay Inter-Agency Task Force nga pagabuligan ro mga pigado nga pamilya nga nagapameligro nga mapalayas sa andang mga baeay kasunod it nagapadayun nga rehabilitasyon sa isla.
Suno kay Malay mayor Frolibar Bautista nga temporaryo nga ginpapundo ro pag-demolish sa mga istraktura nga ginpatindog sa mga ginakabig nga forest land, no build zone ag wetland bangud nga nagapadayun pa ro evaluation kon sin-o ro mga igabutang sa relocation site nga ginaproponer nga ibutang sa mainland malay.
Gindugang pa ni mayor Bautista nga kato pang 2018 nakabaton it show cause order ro mga violators, apang hasta sa makaron hay owa nagpatigayon it self-demolition.
Nasayuran nga ko nagtaliwan nga domingo hay nag-convene ro task force sa boracay agud nga talakayon ro mga estalisimento nga padayun nga naga-eabag partikular sa 25 + 5 meter easement rule sa beachfront ukon no-build zones.
Pila sa mga raya hay ilistaran it kapin sa 40 nga indigent families.
Ginpahayag pa it alkalde nga sa buean eon it Mayo matapos ro termino it task force rason nga ginatinguhaan nanda nga maabot ro target nga eubusan nga malimpyuhan ag ma-rehabilitate ro isla.
Bangud sa covid 19 pandemic, bukon it tanan nga mga ginpadaehan it show cause order hay mapalayas eagi sa andang gina-istaran , apang may mga ginrekomenda ro task force nga padayunon ro demolition sa pilang mga pasaway nga nagapanag-iya it buildings ag iba pang istraktura.
Nagsueod sigon ro National Bureau of Investigation ukon NBI pinaagi sa pag-aresto ag pagkaso sa mga violators agud nga mapadasig ro trabaho.
