KALIBO, Aklan—Kumpiyansa ro Boracay Inter-Agency Task Force nga makompleto ro ginapatigayon nga mga rehabilitation projects sa isla it Boracay sa pihak it pandemya nga tuga it coronavirus disease 2019 (COVID-19).
Suno sa Community Environment and Natural Resources office ukon CENRO-Boracay nga may mga plano eon sanda sa bulig it lokal nga gobyerno it malay ag natungdan nga ahensiya it gobyerno sa pag-demolish sa iba pang mga istraktura eabi eon sa wetland.
Mag-eowas sa pagbawi sa mga wetlands, nagapadayun man makaron ro pagpaeapad it karsada , pagbutang it flood control, pagpaeapad it sewerage ag water systems.
Pila pa sa prayoridad it BIATF hay ro pagpatuman it 25+five meter easement sa beach ag 12-meter easement sa karsada, regulasyon sa carrying capacity, environmental compliance monitoring sa kalidad it tubi, ag ro pagtapos sa construction it karsada ag drainage.
Madumduman nga ginpaeawig pa ni pangueong Rodrigo duterte ro termino it task force hasta sa mayo 8, 2021.
Nadelay it haeos tatlong buean ro rehabilitasyon bangud sa pandemya.
Hasta it Abril 2021 ro target it Tourism Infrastructure and Enterprises Zone Authority (TIEZA) sa pagtapos it andang proyekto sa pag-ayos it drainage project.
