KALIBO, Aklan–Pagatalakayon sa masunod nga domingo it Boracay Inter-Agency Task Force ro hinyu it lokal nga gobyerno it Malay ag mga stakeholders angot sa paggamit it Saliva Reverse Transcription-Polymerase Chain Reaction (RT-PCR) test para sa mga turistang gustong magbakasyon sa isla it Boracay.
Suno kay Malay mayor Frolibar Bautista nga ginakonsidera nanda ro paggamit it saliva test bangud nga mas barato raya ag madasig ro pagpaguwa it anang result.
Nagaeaum ro alkalde nga makabo-oe sanda it positibong sabat agud nga madugangan pa ro numero it mga bakasyunista makaron nga summer season nga makabulig it mabahoe sa pagbangon it resort island.
Gin-insister pa kara nga ro COVID-19 saliva test hay nauna eon nga gin-aprubahan it department of health agud nga magamit.
Haeos 50 porsiyento sigon raya nga mas barato kumpara sa ginapangayo makaron nga RT-PCR swab test.
Madasig man ro anang resulta magguwa nga tatlo hasta ap-at nga oras eamang kumpara sa 12 hasta 24 oras para sa swab testing.
Angot kara, ginklaru ni mayor bautista nga owa pa it ginbag-o sa mga requirements , kun sa siin, obligado sa gihapon ro mga turista nga magpakita it negatibong RT-PCR test result , Tourist QR code ag kopya it confirmed booking sa resort ukon hotel accommodation.
Sa makaron hay naga-average eon sa 700 kada adlaw ro mga nagasueod nga turista sa Boracay.
Nadugangan man ro mga resorts ag hotels nga nataw-an it Certificate of Authority to Operate ukon CAO nga nag-abot eon sa 266.
