KALIBO, Aklan–Nag-abot sa 32.2 bilyong piso ro ginkita it isla it Boracay sa andang tourism receipts ko 2022.
Suno sa Department of Tourism (DoT)-Region 6, ro nasambit nga tourism receipts hay halin sa 1.75 milyon nga mga lokal ag dumueuong nga bisita nga nagbakasyon sa isla ko nagtaliwan nga dag-on.
Ro pinakamataas nga numero it mga turista hay nailista sa buean it Mayo nga may masobra sa 201,000 nga bisita, kun sa siin kumita raya it pinakamataas nga P3.68 billion pesos.
Nagtaas ro tourism receipts bangud sa uman nga pagbalik it international flights sa Kalibo International Airport eabi eon ro direct flights halin sa South Korea ag paghaeuga it ginpatuman nga travel restrictions.
Base sa record, masobra sa 50,000 nga mga turistang Koreano ro nagbisita sa Boracay ko nagtaliwan nga dag-on.
