KALIBO, Aklan—Nagapabilin nga paboritong tourist destination it mga lokal nga turista ro isla it Boracay.
Raya ro ginpahayag ni Malay Municipal Tourism Officer Felix delos Santos matapos ro padayon nga pagtaas it tourist arrival.
Sa kamatuoran suno kana, umpisa hulyo 1 hasta 12 hay naga abot eon sa 13,820 ro mga nagbisita sa isla kun sa siin nagapanguna gihapon kara ro halin sa national capital region ag kaiping nga mga probinsiya ukon NCR plus.
May pilang turista man sigon nga naghalin sa Cebu matapos nga nakaangkon eon it flight paagto sa caticlan international airport.
Bangud nga naga-average eon sa 1,000 hasta 2,000 ro daily visitors arrival sa isla hay target nanda nga maabot ro 30,000 nga bisita sa pagtapos it makaron nga buean it hulyo.
Gindugang pa ni delos Santos nga mag-eowas sa mga sikat nga mga artsta ag mga pulitiko, kaabuan pa sa mga nagabakasyon hay magka-barkada ag magpamilya.
Samtang, ginaeauman pa nga magiging patok man makaron ro ginaduso nga programa it department of tourism nga Boracay Biking Tour, Food Crawl ag Wellness Workation Program.
Kon dati hay gina promote ro isla bilang party beach, makaron hay ginaduso raya nga family destination ag relaxation.
Nauna eon nga gintaw-an ro Boracay kaibahan ro baguio city it ‘Safe Travels Stamp’ it World Travel and Tourism Council (WTTC) bangud sa ginapatuman nga health and safety protocols nga pang world class ukon pasado sa bilog nga kalibutan.
Sa pihak nga parte, bangud nga sangkiri pa eamang ro nabakunahan hay padayun nga iga-require sa mga turista ro negatibong RT-PCR test result maskin nga fully vaccinated eon.
