KALIBO, Aklan — Nagapabilin bilang sikat nga destinasyon sa Asya ro Isla it Boracay makaron nga 2024 suno sa travel website nga Times Travel of The Times of India.
Ro pinakasikat nga destinasyon sa nasyon nga makit-an sa banwa it Malay hay una sa ika-ap-at nga ranggo .
Sambilog ro Boracay sa daywang destinasyon it Pilipinas sa listahan it “8 Most Visited Island Destination in Asia” kun sa siin nakasueod man ro Palawan nga una sa ikatlong pwesto.
Mag-eowas sa maputi ag mapino nga baeas, naging bantog man ro isla bangud sa nagkaeain-eain nga mga water sports activities, buhi ag masadya nga nightlife ag maabu nga mga kaean-an.
Sa makaron hay naeampasan eon it Boracay ro 1.8 milyong tourist arrival target ko 2023 matapos nga masobra sa daywang milyon eon nga turista ro nagbisita sa island-resort.
Madumduman nga dati eon nga nakaibahan ro Boracay sa Time Magazine’s 50 World’s Greatest Places , World’s Best Islands sa Conde Nast Traveler Readers’ Choice Award ag 2024 DestinAsian Readers’ Choice Award.
Ginpangaeanan it Times Travel of The Times of India ro Bali sa Indonesia bilang pinaka-ginabisita nga destinasyon nga ginsundan it Phuket sa Thailand, Maldives, Langkawi sa Malaysia, Havelock Island sa India ag Jeju Island sa South Korea.
