KALIBO, Aklan—Ginklaru it lokal nga gobyerno it Malay nga nagapabilin nga sarado ro isla it Boracay para sa mga turistang halin sa NCR plus ukon National Capital Region, Rizal, Bulacan, Cavite, ag Laguna matapos nga nakapaidaeum pa ro andang lugar sa Modified Enhanced Community Quarantine status hasta sa Abril 30.
Bangud kara, ginpahayag ni Malay mayor Frolibar Bautista nga nagapabilin nga manaba ro tourist arrivals sa isla makaron nga buean it Abril.
Base sa ginpaguwa nga datos it malay tourism office, umpisa abril 1 hasta 25, nakalista eamang it 1,217 nga mga turista nga kaabuan hay mga aklanon ag iba pang taga-Western Visayas.
Gindugang pa nga ginahueat nanda makaron ro nakataeanang anunsyo ni Pangueong Duterte sa adlaw nga Miyerkules angot sa quarantine status para sa NCR-plus.
Bangud kara, ginpadumdum sa publiko nga bawae pa ro mga non-essential travel pasueod ag paguwa it NCR Plus.
Samtang, gindugang pa ni Mayor Bautista nga amat-amat eon nga naganaba ro kaso it covid 19 sa isla it Boracay.
Mag-eowas sa nakalista sanda it zero nga bag-ong kaso ko adlaw it lunes hay nakataeana man nga pagabawion ro ginpatuman nga lockdown sa Zone 1 it Barangay Yapak.
Sa pihak nga parte, ro nabakunahan pa eamang sigon gamit ro sinovac sa banwa it Malay hay ro mga frontliners ag owa pa it update kon hin-uno maging available ro mga bakuna para sa mga tourism workers.
Gindugang pa ni Mayor Bautista nga ginabawae gihapon it lokal nga gobyerno it malay ro operasyon it mga bars sa bilog nga isla kaibahan ro mga restaurants ag food parks nga nagapatigayon it live shows ag banda kamana man ro bueang ag operasyon it mga cockpit arena, ag non-essential gatherings.
Hugut man gihapon nga ginapatuman ro curfew hours nga naga-umpisa alas 11 it gabi-i hasta alas-4 it aga-aga.
