KALIBO, Aklan–Ginkalipay it Malay Municipal Tourism Office ro pag-eakip sa isla it Boracay bilang sambilog sa ‘most Instagrammable’ nga mga lugar sa bilog nga kalibutan.
Nasayuran nga ro Boracay hay pang-39 sa 50 nga mga lugar nga gintumod nga most instagrammable places makaron nga 2023 it UK travel website ag naga-isaeahanon sa Pilipinas.
Apang suno kay Felix Delos Swantos nga kinahangean raya nga pamatud-an pinaagi sa pagiging responsabli nga mga turista partikular ro paglikaw sa pagkalhit it basura ag pag-amlig sa palibot it mga stakeholders sa Boracay.
Gindugang pa ni Delos Santos nga mabahoe ro maibulig kara agud nga mas pang ma-promote ro Boracay sa bilog nga kalibutan.
Madumduman nga nauna eon nga ginpaguwa it Big 7 Travel ro andang Top 50 list nga gin-base sa numero it mga hashtags sa Instagram ag TikTok.
Ro Boracay hay may kabilugan nga 804,525,339 hashtags sa Instagram ag TikTok.
Ko 2022, ro Boracay hay una sa ikaywang pwesto sa Big 7 Travel’s list it “most Instagrammable” spots.
Nagpanguna makaron nga dag-on sa patag it social media engagement ro Milan sa Italy, ginsundan it London sa England, Paris sa France, Istanbul sa Turkey, ag New York sa United States.
Kaibahan sa mga tourist spots sa Asia nga naeakip sa listahan hay ro Nepal ag Bali sa Indonesia, Sri Lanka, Singapore, Tokyo sa Japan, ag Seoul sa South Korea.
