KALIBO, Aklan — Nag-angkon it nagkaeain-eain nga reaksyon halin sa mga netizens ro napabalitang pagpatindog it $500-million nga casino-resort sa isla it Boracay.
Sa Facebook page it Bombo Kalibo, nagkomento ro pilang netizen nga mahimong may kaangtanan raya sa rekomendasyong temporaryong pagpasarado sa isla kabangdanan nga kinahang-ean sigon nga maging mapagbantay ro tanan.
Sambilog man nga netizen ro naghambae nga base gustong kontrolon it Macau investor ro bug-os nga isla kabangdanan nga ginabalewala it presenteng administrasyon ro P56-billion nga maduea sa haeos sang dag-ong total closure kara, kon siin madali raya nga kitaon it national government sa oras nga mapatindog ro casino sa nasambitang lugar.
May mga nagkomento pa nga pilang parte it pagapatindugan it casino hay makit-an sa forest area.
Nagpanawagan man ro pila sa Simbahang Katolika sa Aklan nga padayon nga pamaeabagan ro pagbukas it casino sa Boracay bangud makasamad sigon raya sa anang imahe bilang family-oriented ag wholesome destination.
Nakabaehag sa artikulo nga ro Galaxy Entertainment Group ag ro local partner kara nga Leisure and Resorts World hay nagapangayo eon it pag-apruba para sa nasambitang casino-resort.
Raya hay matapos nga nakipagkita ro mga opisyal kara kay Pangueong Rodrigo Duterte para sa nasambitang plano agud maging kaparte it One Belt, One Road initiative it nasyon.
Suno sa Philippine Amusement and Gaming Corporation (PAGCor), makabulig sigon raya sa pag-umwad it turismo, kon siin ro proyekto hay para eamang sa mga dumueoong, junket operator ag high roller.
