KALIBO, Aklan — Nagtingob pwersa ro Philippine National Police ag Boracay inter-agency task force nga ginakaeakipan it Department of Environment and Natural Resources (DENR), Department of Tourism (Dot) ag Department of Interior and Local Government (DILG) agud mas kapin pang mapangalagaan ro palibot kapin eon sa isla it Boracay.
Sa sangka press conference, ginpahayag ni PNP Chief Police Director General Oscar Albayalde nga nakataeana nandang pirmahan hin-aga ro memorandum of agreement (MOA) agud i-deputize ro mga pulis bilang special environment and natural resources officers.
Igalunsar sigon nanda ro “Kaligtasan at Kalikasan” ukon Kalikasan Volunteer Program nga pagapangunahan ni Environment Secretary Roy Cimatu.
Raya hay pagasundan it panunumpa it Kalikasan Volunteers halin sa tatlong barangay it isla.
Makaangkon man it tree planting program it mga bakhawan sa Barangay Manocmanoc.
Samtang, dugang pa ni Albayalde nga ro programa hay kontribusyon it PNP agud mapangalagaan ro palibot sa tanan nga mga tourist destination sa nasyon, kon siin ro Boracay ro magiging pilot project area.
Igapaidaeom nanda sa training ro komunidad kapin eon ro mga miyembro it Barangay Peacekeeping Action Team (BPAT), NGOs ag volunteer groups bilang mga eco-warriors.
