KALIBO, Aklan — Todo pagpahaom ro ginapatigayon sa makaron it Boracay Inter-Agency Task Force sa uman nga pagbukas it Isla sa Oktubre 26.
Sa ginpatigayong press conferece ko nagtaliwan nga adlaw nga ginpangunahan ni Department of Environment and Natural Resources (DENR) Undersecretary Sherwin Rigor, ginpresentar kara ro initial guidelines para sa Boracay reopening.
Gintalakay sa nasambitang press conferece ro road widening agud maging pedestrian friendly kamana man ro paggamit it electric vehicles, pagtaeana it moratorium sa mga water sports activities ag ro pagpatindog it bag-ong establisiyemento.
Suno kay Usec. Rigor, inde nanda pagpabay-an nga masamad it uman ro Isla partikular ro mga ginahimong improvements ag pagbag-o kon siin ro pila sa mga guidelines hay pagahimuong resolutions it nasambitang ahensiya ag sa ulihi hay magiging ordinansa it lokal nga gobyerno.
Kaeakip sa guidelines ro paglimita sa numero it mga tawo nga pagapasugtang magpabilin sa Isla kaibahan ro mga turista ag trabahador kamana man ro pagbutang it noise insulation system it mga establisyemento agud mabawasan ro kasangag.
Dugang pa kara nga nakataeana sandang magpatigayon it biodiversity assessment ag igabawae man ro pag-angkon it casino ag negosyo nga konektado sa online gambling sa Isla.
May gintaeana ro ahensiya nga probisyon para sa sewage management sa mga maintok ag maeagkong resorts ag pagbag-o sa traffic scheme agud malikawan ro paggutok it trapiko.
Ginkumpirma man kara nga ro rehabilitasyon sa Isla hay magabuhay pa it daywang dag-on.
