KALIBO, Aklan—Target it gobyerno probinsyal it Aklan nga buksan sa domestic tourist ro isla it Boracay sa buean it Hulyo.
Suno kay Malay acting mayor Frolibar Bautista, raya sigon ro naging kaungdan it andang inisyal nga pueong ni Aklan Governor Florencio Miraflores agud amat-amat nga mabuhi ro industriya it turismo nga may mabahoe nga papel sa ekonomiya it probinsya.
Apang, nakadepende gihapon sigon raya sa assessment ag rekomendasyon it Boracay Inter Agency Task Force nga ginabilog it nagkaeain-eain nga ahensya it gobyerno partikular it Department of Tourism, Department of Environment and Natural Resources ag Department of Interior and Local Government.
Ro sigurado sigon makaron hay inde pagpasugtan nga makasueod sa isla ro mga walk in tourist bangud nga 50 porsyento eamang ro pwede nga ma-accommodate it mga DoT-accredited hotels and resorts.
Katuyuan kara nga masunod ro health protocols agud nga malikawan ro pagkalhit it Covid-19.
Nagapadayon pa sigon makaron ro assessment it mga natungdan nga ahensya it gobyerno kon man-uno eon kahaom ro isla sa pagbaton it uman it mga turista.
Eauman suno kay Bautista ro pila ka mga pagbag-o sa new normal.
Sa makaron hay 98 beach guards ro naka-standby sa front beach kamana man 300 pnp personnel ro nakataeana sa bilog nga isla agud nga magsikyar it peace and order sa tunga it pakikipagsukoe sa pandemya.
