KALIBO, Aklan—Padayun nga nagaeaum ro nabungkag nga Boracay Inter-Agency Rehabilitation Management Group (BIARMG) nga iga-renew ni Pangueong Rodrigo Duterte ro andang termino.
Nasayuran nga ro termino it BIATF hay nag-expired ko nagtaliwan nga Mayo 8, 2020.
Suno kay Natividad Bernardino, head it BIARMG nga nagsumite eon sanda it proposal sa Malacañang ko nagtaliwan nga Marso agud nga ma-extend ro BIATF it maskin sang dag-on pa ag an-um nga buean.
Ro BIATF hay gintukod pinaagi sa Executive Order 53, series of 2018, nga nagpatuman it an-um nga buean nga pagpasarado sa isla it Boracay ko 2018.
Gintukod kara ro BIARMG agud nga dumaeahan ro rehabilitation management group.
Temporaryong napundo ro papel it task force sa rehabilitasyon it Boracay matapos nga owa pa it desisyon si Presidente Duterte.
Pila pa sa mga may naka pending nga trabaho sa isla hay ro Department of Public Works and Highways, Tourism Infrastructure Enterprise Zone Authority, ag Department of Environment and Natural Resources (DENR).
Nauna eon nga ginpahayag ni Benny Antiporda, undersecretary it DENR nga maskin nga owa pa natapos ro pilang ground works sa Boracay hay nahimo man nanda nga ma-accomplished ro andang mission.
Ko 2018 hay gintawag ni Presidente Duterte ro Boracay nga cesspool ukon matsa poso negro, apang uman eon nga nagbalik ro anang kaanyag sa makaron
