MALAY, Aklan – Nagbalik eun ro byahe halin Tabon hasta Tambisaan Port makaron nga adlaw, Oktubre 24 apang bukon sigon raya it kasiguraduhan nga magapadayon raya bangud una pa sa Signal No. 1 ro Aklan.
Pahayag ni Ensign Marvince Genzola, Commander it Coast Guard Sub Station Boracay nga mahimo raya ipapundo kun zero visibility sa daywang isla.
Pagpakigbahin man nana nga nakalista it kasamaran ro Cagban Port kun siin haoes katunga it atop kara ro nabueo ukon nabuwal bangud sa Hanging Habagat ag sa pagbugso nga daea ni Bagyong Kristine, dugang pa kara hay ginbaha man ro sangka mall sa isla.
Samtang, bangud nga padayon man ro andang padumdom nga indi magpaeaot rason nga uwa man it kaso it mga naduea nga indibidwal.
May mga stranded gihapon nga pasahero nga haeos sobra 1,000 apang ku ulihi hay hapasugtan man nga magbyahe.
Dugang pa ni Genzola nga uwa man it nailistang mga nasakitan ukon naninahan apang may mga e-trikes sigon nga nagkaeatumba ag naka-angkon it kasamaran.
Sa ulihing datos halin kay Genzola, mabaskog gihapon ro bugso it hangin sa lugar apang uwa kara nabaeabagan ro mga turista nga magwarang ag magpalitrato sa baybayon.
Bangud sa nagapadayon nga maeain nga tyempo padayon gihapon ro pagbantay it Philippine Coast Guard, Local Disaster Risk Reduction Management Office, Local Government of Malay ag Philippine National Police Maritime Group sa Isla it Boracay.
