Kalibo Aklan ——Ginklaro ni Executive Assistant Basil Tabernilla it Local Government Unit it Kalibo nga ro paghugot it uman it mga border checkpoint hay kasunod it nataeopangdan nga paggutok it mga behikulo ag ro pagdagsa it maabong tawo sa banwa it Kalibo.
Suno kana, bukon pa it totally nga eowas sa ginabantayan nga virus ro banwa rason nga kinahang-ean gihapon nga protektahan ro mga pumueoyo.
Maskin nga ginbutang sigon sa General Community Quarantine ro bilog nga probinsya it Aklan hay bukon it buot hambaeon kara nga magpinagusto eon lang ro maskin sin-o nga magsueod sa banwa partikular kon uwa iya nagatrabaho ag kon uwa it importante nga panaw.
Ginpaathag nga Identification Card (I.D) eamang ro ipakita it mga empleyado nga nagatrabaho iya sa banwa sa mga establishimento nga ginpasugtan nga magbukas samtang ro iba hay kinahang-ean nga magpakita it certification halin sa andang natungdan nga alkalde.
Inde pa sigon dapat magpakampante makaron nga panyempo bangud nga may mga confirmatory result pa it mga swab samples nga ginbueo sa mga repatriated seafarers ag repeat testing it mga naunang nailistang kaso it COVID-19 sa Aklan nga ginahueat hasta sa makaron it Provincial Health Office halin sa Western Visayas Medical Center nga imaw ro sub-laboratory it Department of Health sa Region VI.
Makapamayad suno kana nga magsunod anay sa gobyerno samtang uwa pa nagabalik sa normal ro sitwasyon para sa kaeowasan it tanan.
