KALIBO, Aklan — Ginbueo eon it lokal nga gobyerno it Malay ro tanan nga mga border checkpoints pasueod sa isla it Boracay nga ginbutang bilang precautionary measure kontra sa coronavirus disease (COVID-19).
Suno kay Malay Mayor Frolibar Bautista kasunod raya it pagtapos it lockdown nga ginpatuman it China sa Wuhan City ag kabilugang Hubei province, ro ground zero it COVID-19.
Mag-eowas kara, nagtapos eon man ro 14-day quarantine period nga ginmando it Department of Health sa mga tawong may travel history sa China kaibahan ro andang special administrative regions nga Macau ag Hong Kong.
Gin-insister ni Mayor Bautista nga nakabulig it mabahoe ro 24/7 nga border checkpoints nga mapabiling eowas ro banwa it Malay ag bilog nga probinsya it Aklan sa virus.
Sa pihak kara, padayon ro pagbantay sa mga tawong nagasueod sa Malay kapin eon sa Boracay sa andang pag-agi sa Caticlan jetty port ag passenger terminal.
Nasayuran nga antes ginbueo ro border checkpoints, kapin sa 45 nga Chinese nationals ro naharang ko Pebrero 11 samtang sakay it bus nga magabakasyon kunta sa isla.
Puro photocopy eamang it andang passports ro andang ginpakita ag uwa it detalye it andang mga ulihing biyahe nga gin-adtunan.
