Kalibo Aklan —- Temporaryong ginsaraduhan it German Government ro andang border sa limang kaiping nga mga nasyon bilang kaparte it tikang agud nga matapna ro mas pang pagkalhit it coronavirus disease (COVID-19) sa nasambit nga nasyon .
Suno kay Bombo International Correspondet Ma-Ann Lachica, tumandok it Nabas, Aklan ag presenteng naga-istar sa Worpswede, Germany nga sarado eon makaron ro border controls para sa Austria, France, Switzerland, Luxembourg ag Denmark.
Ro mga biyahero nga owa it balido nga rason ro owa ginapasugtan nga makasueod sa border , kun sa siin , ro mga ginapasugtan eamang kara hay ro mga cargo.
Ginpahayag dugang nga sangka rehiyon pa eamang sa nasambit nga nasyon ro ginpaidaeum sa lockdown bangud sa nagatinaas nga kaso it sakit .
Sa makaron hay kanselado eon ro mga klase ag iba pang mga establisimento komersiyal.
Maskin nga apektado suno kana ro mga residente ag trabahador bangud nga kaabuan sa mga kompaniya sa Germany hay nagapatuman it “no work , no pay” eabi eon sa mga part-timer, apang may ayuda ukon subsidy nga ginatau kanda ro gobyerno.
Gina-abisuhan man ro tanan nga mag-observe it social distancing agud nga malikawan ro pagkalhit it virus .
Naobserbahan man ro panic buying sa nasyon rason nga nagka-ubusan it mga supplies partikular ro toilet paper.
Maskin suno kana ro bugas nga owa ginasapak hay naubos man ro supply kaibahan it pasta, delata ag mga tinuean-on rason nga ginlimitahan ro pwedeng mabakae it kada household.
Ro Germany ro ika-lima sa mga nasyon nga may pinakamataas nga kaso it covid-19 .
Nakaexperiensiya sigon sanda it manaba nga death rate ko una bangud nga nag-umpisa ro outbreak sa mga pamatan-on nga may mild eamang nga sintomas ag madasig nga naka-recover
Apang sa makaron hay ginakabaeak-an nga magasaka pa ro numero it mga namatay bangud nga nagkalhit eon ro sakit sa mga katigueangan ag punuan eon man ro ICU it mga ospital.
Sa makaron hay masobra sa 10,800 ro kaso it COVID sa Germany ag may 118 nga patay.
