KALIBO, Aklan — Ginklaru ni Provincial Election Supervisor Atty. Elizabeth Doronilla nga ko buean pa it Abril nagpaguwa it desisyon ro Commission on Elections (Comelec) angot sa pagdeklara nga nuisance candidate sa mayoralty candidate it Balete nga si Ludovico Villaruel, Jr, 68 anyos nga sangka independent candidate .
Apang korondaya eamang nagpaguwa it finality of order ro poll body matapos nga mapas-eawan ro kandidato nga makadihon it motion for reconsideration.
Nasayuran nga ro pagdeklara kay Villaruel bilang pang-gulo hay base sa reklamo it anang kaengkwentru nga si Mayor Dexter Calizo.
Owa sigon it sensiridad ro kandidatura kara bangud nga mag-eowas nga owa man nakita ro anang address sa banwa hay owa raya it ikasarang nga magpangampanya.
Sa pihak nga parte, ginpahayag pa ni Atty. Doronilla nga bangud nga naeakip eon ro pangaean ni Villaruel sa naimprinta nga balota antes ro desisyon, ro anuman nga boto nga anang mabo-oe hay pagakabigon nga stray votes .
Magapaguwa man sigon ro andang election officer it kopya it desisyon sa mga electoral boards agud nga maipaskil sa kada presinto agud nga masayuran it publiko.
