Kalibo Aklan ——–Sa pihak nga nagapasaeamat, apang para sa mga apektadong residente, ulihi eon ro ginhimo nga aksyon it sangka negosyante sa nasamad nanda nga box culvert ag nagaserbing access road it mga pumueuyu sa diversion road, Brgy. Mambog, Banga.
Suno kay Mr. Brady Raquin, sambilog sa mga tagreklamo nga kon owa pa sanda nagpa-media ag nagdangop sa natungdan nga ahensiya it gobyerno hay owa pa naghueag ro ginareklamo nga si Rogenie Villar, tag-ana it sangka car care business sa nasambit nga lugar .
Nasayuran nga ko Hulyo 22 hay nagabot ag natup-ay ro portion it box culvert nga imaw man ro nagaserbing aeagyan it mga residente nga naga-istar sa interior nga portion it lugar matapos nga haagyan raya it delivery truck nga naga-deliver it mga materyales sa pamilya Villar.
Kunta suno kanda hay insigida raya nga gin-aksyunan, apang naging arogante pa sigon ro nasambit nga negosyante .
Ko Hulyo 28 , martes nga adlaw hay nagpatigayon it “on site inspection” ag pueong ro Deparment of Public Works and Highways (DPWH) sa pagpanguna ni District Engineer Noel Fuentebella kaibahan ro Municipal Engineering Office it LGU-Banga, Barangay Kapitan it lugar ag mga apektadong residente.
Makaron nga adlaw it miyerkules hay gin-umpisahan ro pag-repair it pamilya Villar .
Gindugang pa ni Mr. Raquin nga umpisa nga gintukod ro istraktura it car care business ni Villar hay ginsakop kara ro mabahoe nga portion it creek rason nga nagpi-ot man ro andang daean nga nagatuga it disturbo eabi eon kon may emergency .
Mag-eowas kara, maskin ro andang access road hay ginahimo nga parking area it mga saeakyan nga ginapa-ayos sa lugar.
Makabig sigon raya nga illegal bangud nga ro creek hay ro water ways ukon gina-iligan it mga waste water ag tubi-uean paagto sa mga kaeanasan .
Samtang, sa pagtinguha it Bombo Radyo nga maboe-an it pahayag si Mr. Villar, apang nagpamalibad anay raya nga magtau it anuman nga komento.
Nagpahayag man imaw it kahauman nga makipag-ayos sa mga residente sa pagpatunga it Municipal Engineering Office it LGU-Banga sa pag-angkon it road right-of-way.
