Kalibo Aklan ——-Maabu nga mga insidente it pagpang-rape sa India.
Ro iba pang nagakatabu hay gang rape .
Posibleng bangud sa nagatinaas nga kaso it rape ro nagduso sa tatlong Indian Engineering students agud nga mag imbento it bra para mapugngan ukon masuk-ean ro mga rapists.
Ro anti-rape bra hay gintawag nga Society Harnessing Equipment (SHE).
Raya hay may global positioning system (GPS), may sensor ag may device nga sarang nga maghatud it 3,800 kV ukon boltahe it kuryente.
Suno kay Manisha Mohan, estudyanteng nakaimbento it anti-rape bra , kon ro sangka babaye hay ginahana nga himuslan , makuryente ro suspect.
Ginpaathag ni Mohan nga ro una sigon nga ginabuytan it rapist hay ro dughan it babaye .
Kon ginabuytan ukon ginapislit ro dughan it babaye, makuryente ro rapist bangud nga nakakabit sa may suso ro shock circuit board.
Kasunod kara hay maaalerto ro pulisya bangud nga equipped it global positioning system ro device.
Madakpan ro rapist bangud nga masayuran ro lokasyon it krimen.
Kabulig ni Mohan sa pag-imbento it anti-rape bra sanday Rimpi Tripathi ag Neeladri Basu Pal.
Sanda hay mga estudyante it SRM University sa Chennai.
