KALIBO, Aklan—Ginpamilit ni Barangay Kapitan Rafael Briones it Barangay Briones, Kalibo nga bukon it anang responsibilidad ro naireport nga problema sa pilang ka mga housing unit it pabaeay sa nasambitan nga lugar.
Suno kana, obligasyon eun it tag-ana nga maghimo it nagakaigo nga tikang agud nga masolusyunan ro ano man nga problema nga makit-an sa gintao kandang unit.
Gin-insister pa kara nga owa man imaw it ginpermahan nga acceptance sa nasambitan nga proyekto.
Nauna kara, nagpaabot it reklamo ro mga benipisyaryo it pabaeay matapos ro sang gabi-e nga owa it tueog kat nagpanaeasa ro Bagyong Dante sa nasyon kung sa siin nagatueo ro tubi sa andang bubungan ag pader.
Ro iba pa kanda hay nasamaran pa it andang linya it kuryente.
Samtang sa pihak nga parte, ginpahayag man ni Engr. Marlou Villanueva, Municipal Planning Coordinator it LGU- Kalibo nga ginbilinan eun nanda ro tatlong ka mga focal person nga naka-assign sa nasambitan nga proyekto agud nga magreport angot sa nasambitan nga isyu.
Pamaagi kara hay igapaabot sigon nanda ro concern sa National Housing Authority (NHA) pinaagi sa andang contractor.
Nasayuran nga kapin sa 20 ka mga housing unit makarun ro apektado bangud sa pagtueo it uean sa andang bubungan ag pader.
