KALIBO, Aklan—Plano it Barangay Poblacion, Kalibo council nga magdihon it sangka ordinansa angot sa pagbilog it Barangay ID system para sa andang mga pumueoyo.
Ro nasambit nga proposisyon hay gintalakay sa ginpatigayun nga public hearing kahapon it agahon.
Suno kay Kagawad Reygie Bongabong, tuyo kara nga mataw-an it seguridad ag proteksyunan ro mga residente.
Una sigon nana raya nga ginproponer daywang dag-on eon ro nakataliwan apang na-over due bangud sa pagpanaeasa it COVID-19 rason nga uman rayang ginbuhi makarun.
Ro ID hay posibleng magamit sa tanan nga transaksyon sa gobyerno ag bangko kamana man mapadali kara ro distribusyon it ayuda eabi pa makarun nga nagapangatubang sa pandemya ro kalibutan ag iba pang kalamidad.
Nakabutang sa ID ro house number it sangka residente rason nga makabulig raya it mabahoe sa contact tracing.
Ro mga posibleng mag-avail kara hay edad 18-anyos pataas.
Pila sa mga requirements agud nga makabuoe it ID hay endorsement sa barangay kagawad nga in-charge sa area, Voters ID ukon Certificate ag Registry of Baranagay Inhabitance (RBI) kung siin magasukot it 150 pesos kada ID ro Barangay.
Aprubado eon sa unang pagbasa ro proposisyon apang uman pa rayang pagatalakayon sa ikaywa ag ikatlong pagbasa.
Sa oras sigon nga raya hay ma-aprubahan hay insigida nanda rayang iga-implementar.
