Pirmado eon ni Pangueong Ferdinand ‘Bongbong’ Marcos, Jr. ro laye nga nagapaiway sa Barangay ag Sangguniang Kabataan Elections nga nakataeana kunta makaron nga dag-on.
Base sa Republic Act No. 11935, sa baylo nga sa maabot nga Disyembre 5, igapatigayon ro Barangay ag Sangguniang Kabataan Elections sa ulihing Lunes it Oktubre 2023, nga pagahiwaton kada tatlong dag-on.
Rason nga may sang dag-on pa agud nga magpabilin sa pwesto ro mga presenteng opisyal.
Maswerte ro mga barangay nga may responsable ag tampad nga mga opisyal, samtang malas man ro mga may representante nga mga pasaway, rason nga magaeawig pa ro pag antus.
Rason nga gamiton naton raya nga kahigayunan nga mapag-isipan it mayad kon sin-o ro mga nagakabagay nga iboto sa masunod nga dag-on.
Sa kabuhayon nga owa nakapatigayon it eleksyon sa barangay, siguro hay kilaea eon naton kun sin-o ro mga may ‘K’ ag kun sin-o ro perwisyo.
Nasayuran naton ro importansiya it pag angkon it maayos nga gobyerno sa barangay.
Raya ro pundasyon it komunidad.
Kun matino ro mga pinuno, madaea nana ro anang mga nasakupan.
Kunta hay maging wais pa kita sa pagpili ag siyempre, umpisahan man naton ro pagiging responsable sa kaugalingon.
