KALIBO, Aklan—Ginkalipay it mga opisyales it Barangay Poblacion, Kalibo ro pagdeklara it Philippine Drug Enforcement Agency ukon PDEA region 6 nga drug cleared eun ro andang barangay.
Suno kay Punong Brgy. Niel Candelario nga kahapon hay ginpresenta eun nanda sa PDEA region 6 ro andang mga nagakaigong papeles, apang raya hay pamaagi eamang sa online sandig sa ginapatuman nga protocol agud malikawan ro pagtaeapnan it deadly virus nga covid-19.
Nag-abot man sigon sa tatlong dag-on ro andang preparasyon antes nga gindeklarang hilway eun gid sa illegal nga droga ro barangay.
Madumduman nga ro Brgy. Andagao ag Poblacion ro pinakaulihing nalimpyuhan sa illegal nga droga sa bilog nga banwa it Kalibo.
Samtang, ginpahayag man ni Kapitan Candelario nga padayun ro ginahimo nga monitoring it andang barangay anti-drug council agud indi eun makasueod pa ro illegal nga droga sa nasambitan nga lugar.
