KALIBO, Aklan—Madinaeag-on nga nakasueod sa top 5 ro Brgy. Poblacion, Kalibo ag gin kilaea bilang sambilog sa mga grand winner it sangka national competition ukon ginatawag nga Bayanivation 2.0.
Ginkalipay nga ipahayag ni Brgy. Captain Neil Candelario nga maghalin sa tanan nga barangay sa bilog nga nasyon nga nagpartisipar sa nasambit nga kompetisiyon hay sambilog gid ro Brgy. Poblacion nga napilian nga mangin grand winner.
Suno kay Candelario, paagi sa sangka ordinansa nagpasa it daywang ka entry ro konseho ag sambilog sa mga entry nga hapilian ro ordinansa ni kagawad Ken Figarido nga may titueo nga Purok Emergency Response Volunteers.
Tuyo sigon it ordinansa nga magahimu it mga volunteer response team para sa mga purok sa Brgy. Poblacion.
Dugang pa ni Candelario, nakataeana man sigon nga magpanaw ro mga raya sa Maynila para batunon ro award ag ro P100,000 nga cash prize nga pondong pagagamiton para sa nasambit nga ordinansa.
Sa pihak nga parte, antes nga gin gamit bilang isaeang ka-entry nauna eon nga ginapatuman ro nasambit nga ordinansa sa Brgy. Poblacion kung siin nagpaidaeom sa nagakaigo nga mga training ag seminars ro mga volunteers.
