KALIBO, Aklan—Uman nga nakalista it tatlong ka mga kaso it coranavirus disease ukon covid-19 sa Barangay Poblacion, Kalibo.
Suno kay Brgy. Capt. Niel Candelario it Brgy. Poblacion, Kalibo nga raya tanan hay maghalin sa Purok 2 C. Laserna Street, Kalibo.
Ro tatlo hay maghalin sa sangka pamilya nga parehong nagpositibo sa sakit apang may nagkaeain eain nga history of exposure.
Ginapatihan nga ro sambilog sa mga raya hay nabo-oe ro virus sa Kalibo International Airport matapos nga makalista it mga kaso ro nasambitan nga paeuparan kung sa siin raya nagatrabaho.
Samtang ro ina kara hay ginapatihan nga nabo-oe ro virus sa ginatrabahuhan nga sangka pribadong ospital kung sa siin una nga gin-confined ro nigerian national nga nagpositibo man sa makamaeatay nga sakit.
Samtang ro sambilog pa hay na expose man sa andang compound ukon panimaeay ag natapnan it virus.
Sa makarun hay may una eun nga kabilugang 8 nga mga kaso it covid-19 sa nasambitan nga barangay.
Ginahueat pa makarun it LGU ro resulta it mga ginpaidaeum sa swab test antes nga maghimo it desisyon kung magapatuman it lockdown sa lugar.
Sa makarun hay nagapadayun ro ginahimo nga contact tracing it Barangay Health and Emergency Response Team (BHERT) , Municipal Health Office (MHO) ag Kalibo PNP agud nga matumod kung sanday sin-o pa ro nakaangkon it close contact sa mga nasambitan nga pasyente.
Bangud kara, uman nga nagpanawagan si Barangay Kapitan Candelario sa publiko mas kapin sa mga pomoeuyo it Barangay Poblacion nga padayun nga magsunod sa ginapatuman nga health and safety protocol agud nga matapna ro pagkalhit it virus.
Dugang pa kara nga kung owa man lang it importeng napanawan hay mas mayad nga magpabilin eamang sa sunod it panimaeay agud magapabilin nga euwas sa deadly virus.
