Ginlaygayan it barangay council it Pook, Kalibo ro andang mga pumueuyu nga namatayan it alagang baboy bangud sa ginadudahan nga African Swine Fever ukon ASF nga i-eubong it maayos.
Raya hay matapos nga makalista eon it kaso it ASF sa nasambit nga lugar.
Suno kay Pook Punong Barangay Ludy Pinos nga gin-abisuhan nanda ro mga backyard hog raisers nga i-eubong sa madaeum nga kutkot ukon 6 feet below the ground ro mga namatay nga alagang baboy agud nga indi eon magkalhit ro sakit.
Apang antes nga obrahon hay litratuhan anay para sa nagakaigo nga documentation engkaso nga magatau it nagakaigo nga ayuda ro department of agriculture.
Nasayuran nga haeos 14 nga mga baboy ro boluntaryong ginpaidaeum sa culling ukon ginpakatay it tag-ana it sangka piggery sa lugar matapos nga matukiban nga infected it sakit ro mga inug-dispose eon kunta nga mga baboy.
Sa banwa it Kalibo, nakaangkon eon it kaso it ASF sa Barangay Poblacion, Caano ag Pook.
Raya hay base sa kumpirmasyon it Municipal Agriculture Office.
Samtang, hugut nga ginabawae makaron ro pagpasueod ag pagpaguwa it mga baboy sa nasambit nga barangay.
