KALIBO, Aklan—Nagapabilin nga confine sa Aklan provincial hospital ro sangka eaeaki matapos nga barilon it kaugalingon kara nga bayaw nga miyembro it Brgy. Tanod sa may bahin it Brgy. Pampango sa banwa it Libacao.
Ginkilaea ro biktima kay Jiryl Lanciso, 32-anyos samtang ro suspek mat-a hay si Wenny Zonio sa legal nga edad ag residente it nasambit nga lugar.
Sandig sa ginpatigayon nga imbestigasyon it Libacao Municipal Police Sation, una sa idaeom it impluwensya it makahieilong nga ilimnon ro biktima samtang nagapaninggiton sa andang panimaeay it mga bukon it manami nga haeambaeon kontra sa mga barangay opisyal ag tanod sa andang lugar.
Rason nga ginpahipos raya it suspek apang sa baylo nga maghipos ag magpahuway hay nagboue pa raya it butong ag ginpataeawis ro punta ag insigidang nag-adto sa baeay it suspek.
Para magkalma hay nagpaeupok si Zonio it sangka warning shot apang owa nagpatapna ro biktima rason nga daeayon eon lang raya nga ginbaril.
Bangud kara nakaangkon imaw it tama it pagbaril sa dughan nga porsyon it anang eawas.
Angot kara, nagsurender man ro suspek kahapon sa andang kapitan ag insigidang ginturn-over sa Libacao PNP.
Sa makaron, una sa paghinakop it Libacao PNP ro suspek ag nakataeana nga iga-inquest makaron nga adlaw para sa nagakaigong disposisyon.
