KALIBO, Aklan—Seryoso nga isyu ro racism ag mabahoe ro impact kara sa British royal family engkasong mapamatud-an ro alegasyon nanday Prince Harry ag asawang si Meghan Markle, Duchess of Sussex matapos nga uwa ginkilaea ro andang onga nga si Archie bangud sa kakaibang kulay kara.
Raya ro naging opinyon ni Bombo International Correspondent Mr. Jay Garmino, tubong Brgy. Poblacion, Kalibo ag presenteng naga-istar sa London, United Kingdom sa interview it Bombo Radyo Kalibo.
Nag-init ro isyu kasunod it interview sa daywa ni Oprah Winfrey kon sa siin ginaalegar it daywa nga racist ro ginakaimbolbaran nanda nga royal family.
Suno kay Garmino, inde pa sa makaron maidentify gid kon kanyo sa daywang mag-asawa magapangibabaw ro dugo nga naga-eatay sa onga bangud nga inde pa man haeos maidentify ro skin tone kara.
Ko una pa eamang sigon antes nga naging kaparte it andang pamilya hay naeakot eon sa kontrobersiya si Meghan bangud nga uwa raya it royal blood ag halin imaw sa industriya it showbiz kon sa siin bukon it pribado ro anang kabuhi.
Apang, ginpakaslan gihapon raya ni Prince Harry kon sa siin nagpangabuhi sanda nga maeayo sa protocol it royal family.
Sa pihak kara, gindepensahan ni Prince William ro British royal family nga bukon it racist ro andang pamilya kaparehas it naging pahayag it Duchess of Sussex.
Dugang pa it Duke of Cambridge nga interesado sigon raya nga istoryahon ro manghod para maklaruhan ro insidente.
