KALIBO, Aklan — Hugut nga ginpamalibaran it 32 anyos nga si Kenny Natabio, magueang it biktimang si Lina Natabio nga imaw ro brutal nga nagpatay sa anang igmanghud.
Raya hay kasunod it naga-eanog nga balita nga imaw ro ginaturo nga suspek sa krimen.
Sa exclusive interview it Bombo Radyo, ginpahayag ni Kenny nga bilang igmanghud hay indi nana mabatas nga patyon ro anang kaugalingon nga manghud ag babaye pa.
Sa pagkasayud sigon nanda hay owa it kaaway ro anang manghud bangud nga mag-eowas nga menor de edad hay babaye pa.
Gindugang pa ni Kenny nga owa imaw nakasayud sa matuod nga natabu sa biktima antes raya nga naduea bangud nga bukon sanda it magkabaeay.
Apang kat nasayuran nana nga missing ro anang manghud sa sueod eon it daywang adlaw hay nagbulig imaw nga mag-usoy kara.
Indi pa sigon kara mahambae kon nadaeahig ro anang igmanghud sa mga dati kara nga nakaaway bangud nga owa pa it suspek ag owa pa ma-establisar ro motibo sa krimen .
Ro eawas it biktima hay nasapwan it sangka naga-gihit it anwang nga maeapit sa sangka panimaeay nga makaron hay gina-alegar nga gin-abandonar eon .
Nasayuran nga si Kenny ro kamagueangan sa napueo nga magmaeanghud ag ro biktima hay pang-waeo.
Angot kara, nagpanawagan imaw sa suspek nga kabay nga makonsensiya sa ginhimo nga makangieidlis nga krimen ag kabay nga maeo-oy man imaw sa pigado nanda nga sitwasyun.
