KALIBO, Aklan–Ginakonsidera eon nga sarado ro kaso it sangka miyembro it LGBTQ+ community nga brutal nga ginpatay ko Sabado it aga-aga Sitio Tugbungan, Brgy. Pook, Kalibo.
Raya hay matapos nga matumod eon it mga otoridad ro daywa ka mga suspek sa pagpatay sa biktimang si Eduel Rebaño, sangka Barangay Nutrition Scholar it Brgy. Estancia, Kalibo.
Suno kay Police Lieutenant Abdon De Mateo it Kalibo Municipal Police Station nga una eon sa andang kostudiya ro daywang ka mga suspek nga naga-edad 21-anyos ag sangka menor-de-edad.
Ro daywa hay nakataeana nga pagapasakaan it nagakaigong kaso pinaagi sa regular filing.
Base sa imbestigasyon it Kalibo PNP, madasig nga natumod ro pagkakilaean-an it mga suspek pinaagi sa nakita nga conversation sa messenger it biktima sa dati kara nga cellphone nga samad.
Gintinguhaan sigon it imbestigador nga maipaayos ro cellphone it biktima rason nga nabuksan ro messages ag nakita ro mga ginpatigayun nga transaksyon.
Ginasugid nga may gin-istoryahan ro magtimbang nga parte apang owa nasunod rason nga nagresulta sa brutal nga pagpatay.
Pareho sigon nga nag-aku ro daywang suspek nga idtu sanda sa area kung siin natabo ro krimen apang nagatueokdanan kung sin-o ro naghandos sa biktima.
Apang, ro klaro sigon makaron hay pareho sanda nga may partisipasyon sa krimen.
