KALIBO, Aklan–Nagapadayun pa ro imbestigasyon it mga otoridad angot sa brutal nga pagpatay sa sangka miyembro it LGBTQ+ Community nga nasapwan nga nagapaligos sa kaugalingon nga dugo pasado alas-5:00 it aga-aga ko adlaw it Sabado sa sangka payag sa Diversion Road it Sitio Tugbungan, Brgy. Pook, Kalibo.
Suno kay Punong barangay Daisy Andrade it Estancia, Kalibo nga nakibot sanda sa natabo sa biktima nga si Eduel Rebaño nga sambilog sa anang Barangay Nutrition Scholar (BNS).
Mabahoe ro pagpati ni Kapitan Andrade nga hungod ro pagpatay sa biktima bangud sa pitong ka mga lastro kara sa ueo.
Ginapatihan nga ro nakitang kahoy nga may mantsa it dugo maeapit sa crime scene ro gingamit it suspek sa pagpatay sa biktima.
Nagpanawagan man ro opisyal sa tawo nga una sa likod kara nga makonsensya ag atubangon ro anang kasae-anan.
Dapat sigon nga mataw-an it hustisya ro pagkamatay ni Eduel eabi pa ag sambilog raya sa mabuot, masaligan ag maaeam nga empleyado it barangay.
