KALIBO, Aklan—Ginpabugae ni PSSgt. Jane Vega, tagapaghambae it Aklan Police Provincial Office (APPO) nga gin-anunsyo sigon pareho nanday PBGen Sidney N. Villaflor, PRO-6 Regional Director, ag Aklan PPO Director P/Col. Victorino Romanillos, Jr. nga naging matawhay ag generally peaceful ro bilog nga paghiwat sa Western Visayas it Barangay and Sangguniang Kabataan Elections 2023.
Pahayag dugang ni PSSgt. Vega nga may mga nailistang reklamo kaparehas it mga vote buying sa banwa it Banga nga subject for validation kon sa siin nagapadayon ro imbestigasyon it Commission on Elections (COMELEC) angot sa nasambit nga isyu.
May kinagamo man sigon sa polling station sa banwa it Balete nga nakaabot sa Provincial Election Monitoring Action Center apang uwa it pormal nga reklamo nga gindihon sa taeatapan it pulisya.
Sa pihak kara, ro kinagamo nga nagtuhaw sa banwa it Libacao hay insigida man nga naayos bangud nga nagkasugot ro magtimbang grupo nga imbolbado sa nasambit nga insidente.
Kapin sa 1,200 nga PNP personnel ro gindeploy sa tanan nga areas.
Sa makaron suno kay PSSgt. Vega hay ginaplanuhan ag ginapahauman eon nanda ro stratehiya it deployment para sa seguridad it tanan sa paaeabuton nga holidays hasta it Ati-Atihan Festival sa buean it Enero.
