Kalibo Aklan——- Ginpadumdom ni Senator Francis Tolentino ro Bangko Sentral ng Pilipinas sa plano kara nga ibaligya ro maisot nga bahin it gold reserves it nasyon sa tunga it pangkalibutanong pandemya tuga it COVID-19.
Ginhimo ni Tolentino ro padumdom sa deliberasyon it Senate Committee on Finance sa 2021 P4.5-trillion pesos nga National Expenditure Program.
Nasambit it senador nga ginaplanuhan it BSP nga magbaligya it gold reserves para mabawasan ro kaparte kara sa gross international reserves it nasyon.
Padumdom ni Tolentino kay BSP Deputy Gov. Francisco Dakila nga may pilang probisyon sa Republic Act No. 7653 ukon ro New Central Bank Act of 1993 nga nagalimita sa pagbaligya it gold reserves it nasyon maging sa tyempo it krisis.
Paathag ni Dakila, maisot eamang nga bahin it gold reserves ro plano nandang ibaligya ag raya sigon hay sandig sa Monetary Board.
