KALIBO, Aklan—Nagpaandam sa publiko ro Bangko Sentral ng Pilipinas ukon BSP kontra sa mga pekeng kwarta nga posibleng magkalhit makaron bangud sa nagahilapit nga Christmas season.
Ginlaygayan ni Karen Odchigue it BSP-Roxas ro publiko nga usisaon it mayad ro mabaton nga kwartang papel agud nga masiguro nga bukon it peke ro mga raya.
Usisaon sigon it mayad ro kwarta pinaagi sa method nga “Feel-Look-Tilt”.
Ro “Feel” hay ro paghimas sa kwartang papel nga dapat hay magaeas bangud sa gingamit nga materyales kara ag mga naka-embossed nga imprenta samtang ro “Look” man hay ro pag-usoy it mga security feature it kwarta kapareho it embossed prints, watermark, security fibers, asymmetric serial numbers ag mga see-through mark kara nga indi madaling peke-on.
Ro “Tilt” man hay ro pagbalikwas sa kwarta agud nga usuyon ro nakatago nga value kara nga nagiging visible kon ro banknote hay ginapatiyog-tiyog it 45 degrees ag ginatikwas.
Gina-engganyo man it BSP ro publiko nga engkaso nga makakita it mga pekeng kwarta ukon nagaduda kon matuod ukon peke hay pwedeng mag-agto ag ipakita raya sa anuman nga taeatapan it BSP.
Mag-eowas kara, dapat man sigon nga magbakae it money detector ro mga establisimento para sa andang seguridad ag malikawan ro pagkalhit it mga pekeng kwarta.
