KALIBO, Aklan — Padayun nga ginatinguhaan it Bombo Radyo Kalibo nga maboe-an it pahayag ro pamunuan it Barangay council it Bakhaw Norte, Kalibo ag Department of Environment and Natural Resources (DENR) agud nga makumpirma ro gina-alegar nga sangka buaya nga naispatan sa kilid it suba nga sakop it nasambit nga barangay.
Bangud sa insidente, ginasugid nga nagtuga raya it kakugmat ag kahadlok sa mga residente nga naga-istar sa lugar.
Ginpahayag nga pilang residente nga nag-agto sa suba ro nakakita sa buaya.
Ginakabaeak-an sigon nanda nga magtuga raya it halit sa iba pang sapat ukon mismong mga tawo.
Suno sa mga eksperto nga may mga pagtuon nga pila sa mga posibleng rason it sightings it mga buaya hay bangud nga nagtaeang halin sa andang natural habitat ukon naga-inusoy it pagkaon.
Sa makaron hay gusto it mga residente nga maikasa ro pag-usoy ag pagdakop sa buaya agud nga maibalik raya sa anang ilistaran.
