KALIBO, Aklan–Mas maabu nga dapat i-eksplikar kaysa i-deny si Bureau of Corrections (BuCor) director-general Gerald Bantag angot sa kaso it pagpatay sa batikang radio commentator nga si Percival Mabasa ukon mas kilaea sa pangaeangan nga Percy Lapid.
Raya ro pagpati it igmanghod ni Percy nga si Roy Mabasa kasunod it ginpatigayun nga press conference ko adlaw it Sabado sa probinsya it Aklan.
Suno kana, kung padayun nga magdeny si Bantag hay mas pa imaw nga madiin sa kaso.
Pila sigon sa mga dapat kara nga ipaathag hay kung paano nakakasueod sa pasilidad ro mga hinangiban, baril, cellphone, wifi ag iligal nga droga.
Hasta sa makaron hay nagapadayun ro imbestigasyon sa pagtumod sa iba pang eakot sa krimen eabi eon sa gina-alegar nga mga masterminds.
Sa kamatuoran suno kana nga sambilog pang person of interest ro una sa kustodiya makaron it National Bureau of Investigation (NBI) nga ginbiyahe halin sa Iwahig Prison and Penal Farm sa Puerto Princesa City, Palawan.
