KALIBO, Aklan—Pormal eon nga nag-umpisa makaron nga adlaw ro sang buean nga Ramadan ukon pagpu-asa it mga Muslim.
Angot kara, aga-aga pa eamang kaina hay nag-aeabutan eon sa nagkaeain-eain nga mga mosque sa Aklan ro mga Muslim sa probinsiya agud nga magpangamuyo.
Suno kay Solay Hadjunos, presidente it Noor Allah Village sa Camanci Norte, Numancia nga raya man ro umpisa it sang buean nga pagpu-asa ukon fasting kadungan ro tradisyon nga pagpangamuyo it limang beses sa sueod it sang adlaw.
Ro fasting sigon hay sangka obligasyon it kada Muslim mag-eowas eamang sa mga inunga ag mga may sakit nga gina-umpisahan it alas-4 it aga-aga hasta alas-6 it gabi-i.
Bawae man sigon sa bilog nga buean it Ramadan ro pagkaon ag ilimnon kamana man ro tanan nga pangkalibutanong bueuhaton kapareho it pakikipaghieawas ag iba pang nakakasamad sa pagpu-asa.
Dugang pa ni Hadjunos nga ro selebrasyon it Ramadan hay normal eamang para kanda, kun sa siin nagahanda man sanda it komporme, apang bukon it kapareho it kabongga it Eid’l Adha nga katumbas it paskwa it mga katoliko.
Ro pagtapos it Ramadan hay ginatawag nga Eid’l Fitr.
Ginpaathag pa ni Hadjunos nga ro Ramadan ro ika-siyam ag pinaka-sagradong buean sa Islamic Calendar.
Nasayuran nga sa isla it Boracay ro may pinakamaabu nga numero it mga muslim nga ginasundan it Numancia ag New Washington.
