KALIBO, Aklan—Maskin nga ginpasugtan eon it National Inter-Agency Task Force ro pagpatigayon it bueang sa mga lugar nga una sa idaeum it Modified Enhanced Community Quarantine ukon MECQ, apang nagapabilin nga sarado ro mga bueangan sa mainland Malay ag isla it Boracay.
Suno kay Malay mayor Frolibar Bautista nga raya hay mayad nga balita sa mga mahilig magbueang ag una sa mga industriya it bueang nga grabeng naapektuhan it COVID-19 pandemic.
Apang nagahueat pa sanda it guidelines bangud nga bukon it specific ro ginpaguwa nga sueundanan it IATF.
Nasayuran nga bawae pa ro tumaean-aw ukon audience sa sueod it cockpit arena bangud nga ro ginapasugtan eamang hay ro mga nagabuyot it manok.
Mag-eowas kara , bawae man ro pag-broadcast ag pag online it bueang.
Bukon sigon it klaru kon paalin nga makatan-aw it bueang ro mga parokyano.
Sa pihak kara, nagapati si Mayor Bautista nga bukon raya it importante makaron nga tiempo nga may pandemya.
Ipaiway anay sigon ro bueang ag tutukan ro pangabuhian agud nga makaangkon it bastanteng pagkaon ro pamilya.
