Sangka bueawan nga medalya eoman ro nadugang sa probinsya it Aklan sa nagapadayon nga Western Visayas Regional Athletic Association ukon WVRAA meet 2023.
Raya hay maghalin sa patag it boxing nga 48kg category.
Suno kay James Philip Baliguat it Naisud national High School nga grabeng pagpangamuyo ro anang ginhimo antes magsabak sa ring.
Ginbuhos sigon nana rong tanan nga natun-an nga techniques maghalin sa tatlong buean nga hugot nga trainings.
Malisod sigon ro mga training sa sport nga boxing apang disiplina ag kahugod eamang ro kinahangean para maangkon ro kagustuhan nga kadaeag-an.
Napiyerdi ni Baliguat ro naka-engkwentro nga powerhouse nga Negros Occidental.
Bangud sa anang pagdaog hay imaw ro igapadaea it Western Visayas nga magasabak sa palarong pambansa sa Marikina City.
Pagkatapos sigon it WVRAA hay magiging sigidas eon man ro anang training ag mga preparasyon para sa palarong pambansa.
Samtang, mensahe man kara sa mga kapareho nana nga atleta eabi eon gid sa mga gustong magsueod sa patag it boxing nga pirme eamang maghugod sa pag-ensayo ag eakipan it pagtuo sa Ginoo ro tanan nga hampang nga pagasabakan.
Sa makaron, ro probinsya it Aklan hay may una eon nga tatlong bilog nga bueawan nga medalya sa patag it boxing, daywa maghalin sa Malay ag si Baliguat it Ibajay, Aklan.
