Indi maitago nga manami ro gin-aywan nga “Build, Build, Build” program it Administrasyong Duterte.
Rason nga gusto man ni Pangueong Bongbong Marcos ag ko mga mamalidha nga raya hay padayunon.
Owa eamang nakapatindog it mga imprastruktura nga mapuslan kundi nga nagtau man it mga trabaho ro nasambit nga programa.
Angot kara, gusto man kunta naton nga maging kaparte it “Build, Build, Build” ro mga health facilities.
Raya hay agud nga masabat ro kakueangan sa ospital, polyclinics, referral laboratories, birthing centers, ag iba pang pasilid nga pang ikamayad nga eawas.
Mas maabu nga health facilities, mas may away kita sa emerhensiya, kalamidad ag pandemya.
Naexperiensiyahan naton kon paalin nga nagpaeanobra ro mga ospital it mga pasyenteng may COVID-19.
Masyadong masakit makita nga may mga owa eon naka abot sa sueod it ospital ag sa parking lot ukon tent eon ginabawian it kabuhi.
Kabay nga antes pa man uman nga maga grabe ro sitwasyon ukon may mag abot nga panibag-ong bugso it mga sakit hay haum eon kita.
Bukon eamang sa pasilidad kundi eabaw sa pag angkon it mga maisog nga health workers.
Makaron pa eamang hay taw-an eon it atensyon ro kabilugan it atong health system.
