KALIBO, Aklan—Ginpaguwa eon it lokal nga gobyerno it Kalibo ro building design it igapatindog nga modernong Kalibo Public Market ag three-storey nga multi-purpose building.
Suno kay Municipal Treasurer Rey Villaruel nga ginpaguwa nanda raya agud nga mabo-oe ro pulso it publiko.
Ginpaathag kara nga ro three-storey nga multi-purpose building nga nahamtang sa Judge Martelino St., sa Barangay Andagao, Kalibo hay ro temporaryong pagasayluhan it mga vendors it Kalibo Public Market agud nga mataw-an it daean ro construction it nasambit nga tindahan nga nahamtang sa Roxas Avenue Extension, Andagao, Kalibo.
Nauna kara, gindayaw ag ginpasaeamatan ni Kalibo mayor Emerson Lachica ro grupo it mga architects sa Aklan sa paghimo it manami nga design nga magaserbing baeasihan sa pagpatindog it proyekto.
Ko Setyembre 15, 2019 hay nasunog ro portion it tindahan, kun sa siin apektado ro masobra sa 270 nga mga stalls.
Ginpahayag ni Villaruel nga ro bag-ong igapatindog nga tindahan hay ginapanan-aw nga magiging tourism landmark sa Aklan.
Bangud nga mabahoe ro igatukod nga mga building hay mas pang maganami ro pag negosyo kara nga pwedeng mabak-ean it mga souvenirs, pasalubong, delicacies ag iba pang kinahangeanon.
Ro proyekto hay kaeakip sa gin-proposed nga loan it LGU-kalibo sa Development Bank of the Philippines.
Prayoridad sigon nanda makaron nga mabakae anay ro lote sa Judge Martelino nga pagabutangan it multi-purpose building.
